KIA Masat (5) Dap Ba ginra
2012 ning March (10) ya jahpawt hkying (4:30)am aten, KIA Masat (5) Dap Ba ginra, Hkawk Jang mare kaw, Myen Hpyen Dap, Hk.M.Y (381) na hpyen hpung ni hte KIA Masat (5) Dap Ba na hpyen hpung ni gasat poi byin ai lam chye lu ai. Gasat poi byin ai shara hta Myen Hpyen Dap maga de na marai (1) si ai lam chye lu ai.
KIA Masat (5) Dap Ba ginra, Bum Tawng makau grup yin hte Sam Pai lahta kaw (10-4-2012) ya shana maga daw hkying (3:00)pm aten kawn hkying (5:00)pm aten laman, Myen Hpyen Dap Tat Ma (88) na hpyen hpung ni hte KIA Masat (3) Dap Dung na hpyen hpung ni gasat poi byin ai hta Myen Hpyen Dap maga de na si, hkala hkrum ai lam, ram daw law ai hpe chye lu ai.
2012 ning March (9) ya jahpawt hkying (8:30)am aten kaw nna shana maga daw hkying (4:30)pm aten laman, KIA Masat (5) Dap Ba ginra, Npawn mare kaw du nga ai Myen Hpyen Dap, Ts.K.Hk (3) na hpyen hpung ni hte KIA Masat (254,255) Dap Nawng, Dap Dung na hpyen hpung ni gasat poi laja lana byin ai hta Myen Hpyen Dap maga de na hkala hkrum ai law ai hpe chye lu ai.
Myen Hpyen Dap ni, (120mm), (81,82) laknak kaba gap nna Npawn mare wan nat ai ai lam hpe mung matut na chye lu ai.
KIA Masat (3) Dap Ba ginra
KIA Masat (3) Dap Ba ginra hta (10-4-2012) ya shani hkying (10:00)am aten kaw nna hkying (11:00)am aten laman, Myen Hpyen Dap Tat Ma (88) na hpyen hpung ni Sin Lum kaji maga lagaw lam hku lai lung wa ai kaw KIA Masat (21) Dap Dung na hpyen hpung ni hkap gap ai kawn gasat poi byin ai lam chye lu ai.
Myen Hpyen Dap ni KIA Hpyen Hpung ni nga ai Lagat Bum de, laknak kaba hte (3) lang gap bun ai lam hpe mung chye lu ai.
Wunpawng Mungdan Shanglawt Asuya Sam Mung Daju Masat (4) Dap Ba, Dung (36) na KIA myu tsaw share shagan ni gaw April (5) ya shani Mungku ginwang Hpawng Seng na myen hpyen ni a shinglam dap hpe sa htim gasat kau sai lam shiga na chye lu ai. N dai zawn sa htim gasat ai hta myen hpyen la (3) hte balik (2) hpe jahkrung lu rim la lai wa sai lam hte Hpung Seng myen dap hpe mung wan nat jahten kau ya lai wa sai lam shiga na chye lu ai.
Rim tawn da ai myen hpyen la (3) hte balik (2) hpe gaw a tsawm sha bai dat dat sai lam matut na chye lu ga ai.
Wunpawng Mungdan Shanglawt Asuya Dap Ba (5) npu Dap Dung (19) Ginra de dai ni KIA myu tsaw share shagan ni hte myen tai hpyen ni laja lana gasat ai lam shiga na chye lu ai. Ya ten Dap Ba (5) Ginra shara shagu hkan KIA myu tsaw share shagan ni gaw myen tai hpyen ni hte gasat nga ai lam hte Dap Ba (3) ginra de mung myen hpyen mana maka htu shang wa nga ai lam shiga na chye lu ai.
Myen hpyen asuya hpung ni gaw dai hpawt hkying (5 hte 6 am) lapran nbungli hte malu masha ni hte laknak ni hpe pajau bum maga de wa sa ya lai wa sai lam shiga na chye lu ai.
2012 ning April (4) ya jahpawt hkying (9:30)am aten kawn shana maga hkying (2:00)pm aten laman, KIA Masat (5) Dap Ba ginra, Gang Dau Yang kaw nna Npawn mare maga hpyen n-gun jat na matu lai lung wa ai Tat Ma Masat (88) na hpyen hpung ni ngu maram lu ai hpyen n-gun (120) daram hte KIA Masat (255) Dap Nawng, Dap Dung na hpyen hpung ni Salang Lajawn Ngan Seng a Rubber sun makau kaw gasat poi byin ai lam chye lu ai.
Gasat poi byin ai shara hta Myen Hpyen Dap maga de na si, hkala hkrum ai lam, ram daw law ai hpe chye lu ai.
Ya ten, Myen Hpyen Dap Ts.K.Hk Masat (21), Tat Ma Masat (88) na hpyen n-gun yawng (600) daram Gang Dau Yang hte Npawn mare hta du nga ai rai nna, hpyen yen mat ai mung mare masha ni a dusat yam nga ni hpe kam ai hku sat sha, dum nta ni hpe mung wan nat jahten ya ai lam matut galaw nga ai hpe chye lu ai.
Ta Law Gyi mare (Jinghpaw Lawk)
2012 March shata 27 ya shani hta Myen hpyen dap Hk.L.Y (37) dap ni gaw (TAT MADAW NE) masat n’htoi ga baw hte Ta Law Gyi mare (Jinghpaw Lawk) maga Laknak kaba gap bun ai majaw, Slg. La Bung a kashu la kasha (asak 12 ning) a lata kaw pala wa hkra ai majaw lata daw mat ai lam na chye lu ai. Dai sinat kaba a majaw sha Srn Ah Ja a n-ta mung hten za mat sai hte, Slg. Manam La a dum su leng mung hten za mat ai lam na chye lu ai
KIA Masat (5) Dap Ba ginra
Wunpawng mungdan shang lawt asuaya, KIA Masat (5) Dap Ba ginra, Gang Dau Du maga du nga ai Myen Hpyen Dap, Hk.M.Y Masat (390,385,380) na pawng hpawm hpyen hpung ni hte KIA Masat (255) Dap Nawng, Dap Dung na hpyen hpung ni Wa Hpya mare maga gasat poi byin ai lam chye lu ai.
Katsu mare hte Dabak Yang mare hta dap jung nga ai HKLY (58) HKMY (318) myen hpyen dap ni gaw Katsu mare mungmasha htinggaw (39) a mam dang (1590), Dabak Yang mare na mam dang (80) hte Sama Ginwang Hkalup Hpung Rung na n-gu dang (15) hte mam dang (200) tup hpe gashun la nna shanhte hpyen dap malu masha hku madu la kau sai.
Katsu mare, Dabak Yang mare, Gara Yang mare masha ni hpe HKMY (318)dap up gaw 25-7-2011 ya shani hpang jahtum tawn nna Waingmaw, Myitkyina de atik anang hprawng yen shangun ai rai nga ai. Nta madu ni nnga ai ten mare masha ni rem da ai U, Wa, Nga Dumsu ni hte arung arai kaja ai ni hpe mung shanhte ra ai hku gashun la nga dingyang galaw nga ma ai.
Man Je Ginwang Daw ( Man Tsi) kata, Je-U mare e dap jung da ai HKLY (74) Dap ni 20-8-2011 ya shana 8:00 ten lak nak kaba hte gap bun ai majaw, Nam Gau mare hta Saranum Mai Awng laika woi hti sharin nga ai nta e laknak kaba myawk si langai hkrat kapaw ai majaw Saranum hte jawngma kaji marai (4) hpe pala si kapaw hkra ai. Hpaula Htu ( asak 6 ning) gaw kalang ta si sum mat sai.
Hkala hkrum ai ni gaw;
1. Saranum Mai Awng
2. Labang Bawk San (Asak 7 ning,Tsang langai) Saranum a kasha
3. Ndau Bawk Ra (Asak 7 ning, Tsang langai)
4. Ndau Di Ra ( Asak 6 ning,Jawng kaji)
Hkala hkrum ai ni hpe Nam Lim Pa KIO tsi jaw gawk hta tsi lajang ya nga ai.
19-8-2011 ya shani Chyahkan Dap mare na Salang Maran Naw Bawk hpe HKLY (47) dap na Major Than Kyaw Soe gaw dap kata shaga la nna adup gayat zingri ai majaw machyi sawng mat ai. Ya ten, Nmawk tsi rung e tsi tsi hkam la nga ai lam na chye lu ga ai.
Lai wa sai July shata 29 ya shani Wunpawng Mungdan Shanglawt Asuya, Dung (15) ginra rai nga ai Ja Hkan Dap mare hta malu masha ni htaw lung wa ai myen hpyen hpung ni a mawdaw (2) hpe Myu tsaw hpyen hpung ni kapaw kau ya lai wa sai hpang, myen hpyen hpung ni gaw Ja Hkan Dap mare hte Nam Hpak Hka ( deng 17 ) mare ni hta shanu nga ai mare masha ni hpe mara kata adup gayet jep zingri nga ma ai lam shiga na chye lu ga ai.
Dai ni ( 25.July.2011 ) ya shana de daw maga kaw na Nam San Yang makau hta Wunpawng Mungdan Shanglawt hpyen hpung hte myen tai hpyen ni a lapran majan bai byin hpang wa sai re, majan hta myen hpyen ni maga de na hkrat sum ai lam kaji gajaw byin hpang nga sai lam mung matut na chye lu ga ai.
Ma ni ( 24.July.2011 )ya jahpawt daw kaw na byin nga ai Dung (5) ginra hta gaw gasat gala ai lam matut manoi byin nga ai hta Shwe Gu Ginwang hta dap jung da ai myen hpyen dap Hka La Ya (141), (142) sha n ga laga myen hpyen hpung (5) ram bai jat bang wa sai lam shiga na chye lu ga ai.
Dung (10) ginra rai nga ai Chihpwi maga de mung Wunpawng Mungdan Shanglawt hpyen hpung hte myen tai hpyen ni gasat nga ma ai lam shiga na chye lu ai.
RSS Feed